Rimuar iti 2023 Annual Audit Report ti Commission on Audit para iti Department of Public Works and Highways ti P783,529,617.36 nga advance payments kadagiti kontratista a saanda a napasubli agingga iti naudi a paset ti tawen.
Dagiti proyektoda a nag-advance payment ket ti 353 nga infrastructure project a nalpas, saan a nalpas, ken agur-uray a materminate ti proyekto.
Nagballaag ti COA a mailabsing iti Revised Implementing Rules and Regulations ti RA No 9184 a dakkel a pagpukawan ti gobierno iti dakkel a gatad/
Karaman kadagiti natakuatan ti COA ket dagiti sumaganad:
P388 milion a naibayad iti 253 a nalpas a proyekto; P351. 7 milion para iti 94 a saan a naituloy a proyekto; ken P 43.7 milion para iti innem a proyekto a maileppas..
Dagiti saanda a napasubli a pauna a bayad ket isu ti rason a saanda a naikkat iti 15 percent iti periodic progress payment kadagiti kontratista agingga a mabayadan dagiti cash advance-da.
Maibilang pay ti takkuat ti COA a saanda a napasubli ti advance payments bonds idi naterminate dagiti kontrata.
Kurang ti monitoring (panagbantay) ken saan a husto ti panangkissayda no i-billing ida dagiti kontratista. Saan a kompleto dagiti accounting records, ken ti nabuntog a proseso kadagiti singiren ti kontratista.
Uray dagiti saan pay a nabale nga advances ket mangitunda iti dakkel a gated ti pondo ti publiko a saan a naaramat ti gobierno para iti dadduma pay a napateg a proyekto.
Isu nga inkalikagum ti COA a dawaten/adalen a sigida dagiti cash advances dagiti kontratista, no saan i-forefeit dagiti intedda a bonds.
Rebbeng a rugian ti legal action/ ikaso dagiti kontratista a saanna a kayat nga isubli dagiti cash advances-na.
Nainget a naisingasing a sayaaten ti monitoring mechanism tapnon masigurado ti pannakaipasubli/pannakaikkat dagiti cash advances kadagiti billing ti proyekto.
Kasta payen ti panangpasyaat iti monitoring mechanisms tapno masigurado a naitiempo ti panangkissay iti advances manipud kadagiti progress billings.
Masapul pay a maipatungpal dagiti probisyon ti kontrata a mangipalpalubos iti panangkissay ti advances manipud kadagiti claim ken dadduma pay nga agdama a proyekto nga adda kapadana a kontratista.
Masapul a maipataw dagiti administrative sanctions kontra kadagiti kameng a saan a nakasurot kadagiti proseso ti panagbale.
Kabayatanna, pinasingkedan met ti management ti DPWH ti agtultuloy a panangikagumaan a mataming ti isyu, kas kadagiti demand letters kadagiti kontratista, pannakitinnulong kadagiti regional offices tapno maipatungpal ti koleksyon, ken panangisayangkat kadagiti legal a remedy.
Iti baet dagitoy nga addang, inyunay-unay ti COA ti panagkasapulan a naing-inget a panangsurot ken nayun a remedial actions tapno maliklikan ti nayon a panagadu dagiti saan a nabale nga advances.
