VIGAN CITY – Nasalamaan ti maysa a closed van a nagkarga iti chicken products a mapatta-patta nga aggatad iti P600,000 iti national highway idiay Animal Quarantine Checkpoint, Barangay Bio, Tagudin, Ilocos Sur.
Segun ti Tagudin Municipal Police Station, ti naglabsing ti Provincial Ordinance No. 15-06 Series of 2015 ket ti nagmaneho ti Isuzu Closed Van a ni Aldrin Villanueva Albania, agtawen iti tallopulo ket tallo, naasawaan, driver nga agnaed idiay Barangay Golden Shower St. Barangay Payatas, Quezon City; kaduana dagiti helper-na a da Marbien Latumbo Tomeo, agtawen iti duapulo ket pito, naasawaan ken Andrew John Mañalac Gacayan, agtawen iti duapulo ket lima, helper nga agpada nga agnaed idiay Barangay Mountain View Resort, Mariveles, Bataan.
Nasalamaan dagiti kameng ti Tagudin Animal Quarantine babaen ti panangidaulo ni Gary Guevarra kaduada ti Tagudin Municipal Police Station ken dadduma pay nga otoridad ti nasao a closed van a naglaon iti uppat a ribo siam a gasut sangapulo ket siam a manok nga aggatad iti P600,000 ket napaneknekan a naglabsingda iti paragraph j iti Provincial Ordinance.
Iti agdama, dagiti naglabsing ket addan iti kustodiya iti Animal Quarantine Checkpoint, Barangay Bio Tagudin para ti proper disposition.
