Nangala iti DNA sample ti Suyo Municipal Police Station manipud iti claimant ti nasarakan a rurog idiay Sitio Damuco, Barangay Suyo Proper, Suyo, Ilocos Sur tapno maidalan iti testing.
Ti claimant ket manipud Peñarrubia, Abra ta kunana a mapukpukaw ti anakna sipud pay idi 2020 ken ti bado ti rurog a nasarakan ket agparis iti ginatangna idi a bado para iti kabsatna.
Iti pannaki-uman ti Bombo Radyo Vigan ken ni Police Major Godofredo Ribuyaco, gagem ti DNA testing a makumpirmaran no dagiti rurog ket ag-match iti claimant ken maammuan ti pakabigbiganna.
Segun met kadagiti agindeg iti lugar, nakakitada idi ti maysa a lalaki a magmagna iti nasao a sitio kabayatan iti napigsa a tudo ken atapenda nga adda parikut iti panagpampanunotna.
Kabayatanna, atapen dagiti pannakabagi ti linteg a posible a naikaglis ken nayanud ti biktima idi katengngaan ti napigsa a tudo.
Agtultuloy met ti panawagan ti kapulisan kadagiti adda kabagyan wenno kapamiliada a mapukpukaw ta makibinnuligda kadakuada tapno maalaan ida iti DNA sample.
