Napalaus ti ragsak ti junior cyclist iti Ilocos Sur kalpasan iti panagbalina a kaunaan a Filipino rider a nangabak iti 2026 Gimcheon International Junior Road Race idiay South Korea.
Iti pannaki-uman ti Bombo Radyo Vigan ken ni CJ Cabreros a tubo idiay Narvacan, Ilocos Sur, nangabak isuna iti dua nga stage nga isu ti Stage 1 ken 2, ken nagbalin nga Overall General Classification Champion.
Segun ken ni Cabreros, iti baet a nasurok sangagasut iti kalabanna ket nagpokus laeng isuna iti bagina tapno magun-od iti umuna a pannangabakna iti international competition.
Kinunana nga umabot iti tallo nga aldaw iti kompetisyon ta iti umuna ken maikadua nga aldaw ket isu ti nagkampeonanna iti dua nga stage idinto a ti maikatlo ket nag-6th place laengen ta patienna a binantayan isuna dagiti kalabanna tapno maartapanda.
Pinasingkedanna a saan a nagsarsardeng a nagsanay ta tunggal malpas iti klasena ket mapan agbisikleta tapno mapasayaatna pay iti performance-na.
Nagyaman ni Cabreros iti amin a timmulong kenkuana nangruna dagiti nangipaay ti suportar tapno makadanon ken magun-od iti balligi nga adda ita kenkuana.
Kabayatanna, pinasingkedan ti coach ni Cabreros a ni Jemico Liberato nga iti baet a nabarbara iti panawen idiay South Korea ita a gundaway ket nakabaelan ni Cabreros iti laban ta nasanay isuna iti aniaman a klima ta nagbalin a training ground-na idiay Abra ken uray Cervantes ta adda dagiti lugar a nalamiis ket inton bumaba wenno agsubli iti ilida ket nabaranto manen iti panniempo.
Ninamnaman ti coach a makadanon ni Cabreros iti international race gapu iti pannangabakna national championship idi kallabes.
