VIGAN CITY – Matuloyen ita nga aldaw ti pannakaisayangkat ti Civil Service Examination kalpasan ti pannakaisanudna idi kallabes gapu ti Covid19 pandemic.
Iti pannaki-uman ti Bombo Radyo Vigan ken ni CSC Region 1 Director Jiggs Lardizabal, masapul a nasapsapa pay ngem iti alas sais y media iti agsapa ket addan dagiti examinee iti venue nangruna no saanda pay a nakita ti room assignment-da ken para payen ti pannakakita dagiti requirement-da nga agexam pakairamanan ti panagsuratda iti health declaration form ta no agalas syete y median ket maisarran ti gate ket dagiti laengen test administrator ti mabalin a makastrek.
Awan ti baro nga examinee para ita a batch ta dagiti examinee ket dagiti saan a natuloy idi July 18 ngem inton June 19 ket impanamnama ni Lardizabal a posible a mabalindanto a mairaman dagiti baro nga examinee agsipud ta ipangrunada pay ti adu a request dagiti ahensia.
1,650 ti bilang dagiti ageksam idiay San Fernando; 700 iti Vigan City; 110 iti Lingayen; 738 iti Dagupan; ken 725 iti Laoag.
Innayon ti opisial a numan bilang maidalan iti Alert Level 0 ti pagilian ket posible a maisublinton ti dati a duapulo ket lima nga agyan iti maysa a testing room ngem ita ket sangapulo ket dua laeng ti mabalin.
Tunggal examinee ket kasapulan nga agitugot iti valid ID, application receipt, ballpen ken vaccination card no isuda ket fully vaccinated idinto a dagiti saan pay a nabakunaan ket masapul iti negative result ti RT-PCR, antigen, wenno saliva test.
Malaksid dayta, kasapulan pay a nakaaramatda iti facemask ken nakadepende met kadakuada no kayatda ti ag-faceshield ken sumurot iti dadduma pay a health protocols kontra Covid19.
