Nagballaag ti opisina ni Vigan City Mayor Randy Singson iti publiko kontra kadagiti saan nga otorisado ken saan a verified a panagusar ti nagan ken opisina na iti panag-order ti makan, supplies ken dadduma pay nga items manipud kadagiti establisimiento ken indibidual.
Impakaammo ti lokal a gobierno nga amin a transactions, orders, ken requests a naaramid nga awan ti official written communication, proper identification ken direct coordination na iti City Government of Vigan ket saan nga otorisado ken saan a mapatgan.
Kinaritda pay ti publiko nga agbalin a nasirib kadagiti mapagduadua-an a tawag, text, ken transactions a mangar-aramat ti nagan ken opisina ti mayor ket kiniddaw da nga dagus nga ipakaammo iti Vigan City Police Station wenno ti lokal a gobierno para ti beripikasion ken aksion.
Kabayatanna, inlawlawag ti city government of Vigan a saanda nga agdudua a mangaramid iti legal action kontra kadagiti karaman iti aktibidad.
