Inwaragawag ni Executive Secretary Lucas Bersamin a ni Police Major General Nicolas Torre III ti nadutokan a baro a mangidaulo ti Philippine National Police.
Sukatanna ni Police General Rommel Marbil a ti temporaryo a terminona ket malpas inton Hunyo 7, 2025.
Idi Pebrero 2025, inyatiddug ni Presidente Ferdinand Marcos Jr ti termino ni Marbil iti uppat a bulan, nalablabes ngem iti compulsory retirement age a 56, tapno masigurado ti natibker a panangidaulona iti PNP iti panawen ti eleksyon.
Ni General Torre ket nagturpos iti Philippine National Police Academy Class of 1993 ken adda nalawa a kapadasanna iti nadumaduma a yunit ti PNP.
Sakbay ti pannakapilina kas CIDG Chief, nagserbi pay kas hepe ti Police Regional Office 11 Davao Region nga isu ti nangidaulo ti balligi nga operasyon a nakakemmegan ni Pastor Apollo Quiboloy, ti lider ti Kingdom of Jesus Christ Church, a sumangsango iti kaso a human trafficking.
