Nakita ti Philippine Coast Guard (PCG) ti maysa a drone a mapapati a kukua ti China Coast Guard (CCG) a nangisayangkat ti surveillance iti paset ti West Philippine Sea (WPS).
Segun ti PCG, kasaruno iti pannakakita iti drone ket insigida a nangipatulod ti radio challenge dagiti barko iti CCG kangrunaan ti CCG vessel 5101 ken 5103 iti BRP Cape Engaño (MRRV-4411) iti Pilipinas bayat nga adda iti kaadayo a 52.8 nautical miles manipod Secam Island.
Nagballaag ti China Coast Guard iti barko ti Pilipinas a mangibagbaga a simrek iti teritoryo a sakupen ti People’s Republic of China ken imbilinda a pumanaw iti lugar.
Kinontra dayta ti BRP Cape Engaño ket impaganetget ti PCG a lehitimo ken legal ti presensyada iti lugar kas mayannurot iti international law.
