VIGAN CITY- Nagballaag ti National Disaster Risk Reduction and Management Council (NDRRMC) ti posible a panagtinnag dagiti debris manipud iti pannakairusat ti Chinese Long March 7A rocket iti kabaybayan iti asideg ti Ilocos Norte ken Cagayan.
Iti memorandum a napetsaan iti Hunio 25, inalerto ti NDRRMC dagiti maseknan nga ahensia ti gobierno maipapan iti pannakairusat ti rocket ti China, a naka-schedule iti nagbaetan ti Hunio 28 agingga iti 30.
Mainaig iti daytoy, kiniddaw ti NDRRMC kadagiti maseknan nga ahensia ti gobierno nga ikonsiderarda ti pannakaipakat dagiti temporary restrictions, panangipakaamo kadagiti marino, ken coastal navigation warnings para iti kinatalged dagiti tattao nga asideg kadagiti nasao a drop zones.
Segun iti NDRRMC, saan nga alallukoyen ti Philippine Space Agency (PhilSA) ti publiko nga alaen wenno umasideg kadagiti debris gapu iti peggad manipud kadagiti nabatbati a makasabidong a substance kas iti rocket fuel.
