Mamati ti Department of Foreign Affairs a saan a makatulong iti nasayaat ken nadur-as a relasion ti Pilipinas ken China ti panangiparit ti Beijing ti panagserrek dagiti opisial ti Kalayaan, Palawan.
Iparit ti China ti panagserrek ti sangapulo ket innem nga opisial ti Kalayaan, pakairamanan ti Hong Kong ken Macao kalpasan nga indeklarar a persona non grata ti lokal a gobierno ti Chinese Ambassador a ni Jing Quan gapu iti maipagarup a panaglabsing iti diplomatic protocol ken pannaki-biang iti internal affairs ti Pilipinas.
Segun ti DFA, uray pay karbengan ti maysa a pagilian ti agipatungpal ti travel ban, saan a makatulong daytoy iti panangpapigsa ti bilateral relations ken people-to-people exchanges a pada nga inkari ni Pilipinas ken China.
Ti Kalayaan ket agmaymaysa nga ili ti Pilipinas a masarakan iti West Philippine Sea nga agtultuloy nga al-alaen ti China ti dandani intero ti kabaybayan iti baet ti international ruling a mangibagbaga nga awan ti legal a basaran para iti claim-da.
Iti napalabas a tawen, kimmaro ti tension ti nagbaetan ti dua a pagilian gapu kadagiti insidente iti kabaybayan, pakairamanan ti panagusar ti water cannon kontra kadagiti barko ti Pilipino.
