Impatangken ni Armed Forces of the Philippines (AFP) Chief of Staff Gen. Romeo Brawner Jr. a nalawag nga aggressive tactics iti impakita iti China iti kaudian nga insidente idiay Bajo de Masinloc, West Philippine Sea.
Segun ken ni Brawner, makita iti video ti panagbalin nga agresibo dagiti barko iti China.
Iti assessment, nalawag nga inggagara dagiti barko ti China a dungparen ti Philippine Coast Guard (PCG) ngem nasayaat ta napaspas a nakalisi ti PCG vessel isu a saan a natuloy ti pannakadungpar nu diketdi dagiti dua a barko iti China iti nagdinnungpar.
Impaganetget ni Brawner nga awan ti karbengan ti China a tagikua-en ti Bajo de Masinloc ta nalwag a paset dayta iti teritoryo iti Pilipinas.
Innayon pay ni Brawner a kas iti sarita ni Pres. Ferdinand Marcos Jr. saan a kayat ti AFP ti rinnupak ngem saanda nga atrasan iti aniaman a pangta kontra iti pagilian.
