VIGAN CITY – Natay iti pammaltog idiay Brgy. Cabaritan, Sto. Domingo ni Tirso Rin, Chief Tanod ken dati nga opisial ti Brgy. Suksukit, Sto Domingo.
Iti pannaki-uman ti Bombo Radyo Vigan ken ni PLt. John John Garan, nagmotorsiklo a nagawid ti biktima a naggapu idiay Brgy. Sta. Cruz idi pinaltugan dagiti nakakotse a suspek.
Nakataray pay laeng a mapan agkamang iti maysa a balay ngem kinamat dagiti suspek ket pinaltuganda ti biktima babaen ti mapapati a caliber 45 ti nadumaduma a paset ti bagina a ti kangrunaan a napurwan ket ti akin-kannawan a bakrangna ken maysa a tama iti bala ti ti ulona.
Kabayatanna, naala dagiti pannakabagi ti linteg manipud iti biktima ti Norinco 45 a paltog nga ikotna ken pinasingkedan ni Garan a ti biktima ket awan met ti nakaririna iti kallabes.
Nupay kasta, maim-imbestigaranen no ania ti motibo iti napasamak a pammaltog a nakatayan ti biktima.
