VIGAN CITY – Mangrugi inton bigat (May 1) ket awanen ti checkpoint iti Central Dike ti Quezon Avenue, Barangay Pantay Daya, Camanggaan, ken Tamag isu a nawayan a makastrek dagiti motorista ken dadduma pay a lugan.
Dayta ket gapu ti bimmaba a kason ti Covid19 sipud ti naipatungpal ti nainget a panagserrek ken dagiti health protocol nga agserbi a leksyon ken ballaag iti amin.
Nupay kasta, imbilin ni Vigan City Mayor Juan Carlo Medina ti kanayon latta a panagridam dagiti residente ken establisimiento ti siudad ta masapul nga isuda ket naface mask, faceshield, ken rebbeng nga adda logbook wenno application a makatulong para iti contact tracing.
Malaksid ti dayta, impaganetget pay ti mayor ti kanayon a panagdisinfect ken panangipatungpal iti social distancing kasta payen ti panangliklik kadagiti non essential travel.
