Nakasagana a mangted ni dati nga Ilocos Sur Governor Chavit Singson iti lima milion a pisos iti asino man a makapaneknek a black sand mining ti mapaspasamak iti kabaybayan iti ili ti Caoayan.
Nadakamat dayta ni Singson iti napasamak a panagpapatang iti Our Lady of Hope Parish Church-Caoayan kadua Parish priest Robert Somera, dagiti barangay official ken dadduma pay a maseknan nga agindeg iti Puro, Tamurong, Villamar ken Fuerte.
Ti gatad ket nangatngaton ngem iti immuna nga indiaya ti dati nga opisial a dua milion a pisos.
Iti panagsarita ni Singson, kunana nga awan kinaagpaysona a black sand mining ti mapaspasamak iti kabaybayan a sakupen dagiti nadakamat a barangay ta daytoy ket isyu laeng.
Inlawlawagna a saanda a mabalin nga isardeng ti dredging operations a maar-aramid ta amangan nga iti masangwanan ket isudanto a maseknan nga opisial ti mapabasul no apay a saan a na-dredge ket pakaigapuanto ti layus.
Nupay kasta, pinagyamanan ni Singson ti panangipalubos ni Fr. Somera a sumangbay iti ili tapno maidatag dagiti pakaseknan dagiti agindeg.
