Inkari ti negosyante ken sports patron Luis Chavit Singson a suportaranna dagiti Pinoy athletes a mangitagtag-ay iti bandera ti pagilian iti international scene.
Malaksid iti panagbalin a gobernador, congressman, ken mayor iti Ilocos Sur, nagbalin pay a chairman emeritus ti Philippine National Shooting Association isu a pamilyar iti taray ti sports.
Kangrunaan a tutukan ni Singson dagiti Pinoy athletes nga agkasapulan iti naan-anay a suporta tapno maingato ti kalidad ti panagay-ayamda kadagiti international competition kas koma kada gymnast Carlos Yulo ken weightlifter Hidilyn Diaz-Naranjo.
Pinadayawan ni Singson ni Diaz nga isu ti kaunaan a nangiyawid iti balitok a medalya ti Pilipinas iti Olympic Games idi 2021 idiay Tokyo, Japan idinto a saluduanna met ni Yulo iti pannakagun-odna iti dua a gold medal iti 2024 Paris Olympics.
