Pinasingkedan ni dati Ilocos Sur Governor Chavit Singson a saannan a suportaran ni Presidente Ferdinand Marcos Jr iti sumarsaruno nga eleksyon ta nakalipaten ti presidente kadagiti nangtulong kenkuana a maaddaan iti turay.
Iti pannaki-uman ti Bombo Radyo Vigan ken ni Singson, bise presidente laeng koma idi ti tumarayan ni Marcos ngem isuna ti nangdurog tumaray iti kinapresidente ken nangkadkadua kenkuana iti kampania.
Nadismaya ni Singson ta iti baet ti panangtulongna iti presidente kabayatan iti 2022 elections ket kasla saannan nga am-ammo ti dati a gobernador.
Iti pay biaheda idiay Japan, nadakamat amin ni Marcos dagiti nagtugaw iti presidential table malaksid laeng kenkuana.
Sipud iti daytan, saannan a makapatang ti presidente numan pay pinadas ni Singson a makipatang kadagiti secretaries, ngem saanda a sungsungbatan.
Nupay kasta, kinuna ni Singson nga urayenna lattan a malpas ti termino ti presidente, ta amangan no isunto laeng ti gundaway a maam-ammodanto manen isuna.
