Saan a pakasikuran ni dati nga Ilocos Sur Governor Luis Chavit Singson ti naipila a plunder ken graft kontra kenkuana idiay Office of the Ombudsman ita nga aldaw gapu ta kunana nga ‘extortionist’ ti akin-aramid.
Ti kaso ket adda pakainaiganna iti mapapati a panaggatang iti P149 million iti sangapulo nga ektarya ti daga ti Narvacan Farmers Market a ti market value-na ket P49 million laeng.
Sabali pay ti mapapati a panangsakup ni Singson iti kabaybayan iti Sulvec, Narvacan para iti naipatakder a Santorini resthouse.
Iti pannaki-uman ti Bombo Radyo Vigan ken ni Singson, namin-anon a daras nga inikkanna iti kuarta ni Atty. Estelita Cordero ket patienna a ti panagkedkedna a manggatang iti ilaklakona a hotel nga aggatad iti P20 million ti rason no apay a nagipila iti kaso.
Saan a kinayat ni Singson a ginatang ta idi napanna kinita ket bassit ken adda laeng dua a kuartona, nga isu atapenna a nakapungtotan ti abogado.
Kunana pay a kastan ti galad ti nasao nga abogado nga inladawanna a salawasaw.
Nupay kasta, sisasagana latta met ti dati a gobernador a dumalan iti husto a proseso.
Ikagkagumaan met ti Bombo Radyo a mangngegan ti biang ni Atty. Cordero.
