Indatag ni dati nga Ilocos Sur Governor Chavit Singson dagiti rason no apay a kinayatna ti tumaray iti kinasenador inton umay nga eleksyon.
Iti pannaki-uman ti Bombo Radyo Vigan ken ni Singson, saanna a plano idi damo ti tumaray ngem immanugot gapu iti panangiyendorso kenkuana ni dati a Presidente Rodrigo Duterte ken dagiti miembro iti Governor’s League ti pagilian.
Maysa kadagiti kayat a pasyaaten ni Singson ti seaport economic zone ta patienna a babaen iti daytoy ket ad-adda pay a dumur-as ti pagilian.
Malaksid dayta, napaliiw pay ti dati a gobernador a 77 percent iti populasyon ti awan ti bank account-na isu a kayatna a maipaayan ti tunggal umili iti card a kas iti impatungpalna iti ili ti Narvacan idi nagtakem a mayor.
Babaen iti nasao a card, mabalin ti agideposito ken agiwithdraw iti kuarta a saanen a kasapulan pay ti mapan kadagiti bangko.
Nupay kasta, impaganetgetna a ti makatulong kadagiti umili ti kangrunaan a gagemna ken kayatna nga ipangruna ti Ilocos Sur.
