Inallukoy ni Philippine Red Cross Chairman Richard Gordon ti publiko a makipaset iti tinawen a blood letting project a “Dugong Bombo 2026” ti Bombo Radyo Philippines ken Star FM a nasurok dua a dekadan a maisaysayangkat iti pagilian.
Segun ken ni Gordon, agserserbi a natibker a kabinnulig ti Red Cross ti nasao a programa iti panangipasigurado iti makanay a suplay ti dara, nangruna kadagiti panawen a makapadpadas iti nakaro a kinakurang dagiti blood bank.
Impasigurado ti opisial a dakkel a tulong ti nalawa a masakupan ti aktibidad nga aggigiddan a maisayangkat kadagiti 25 a kangrunaan a lugar iti intero a pagilian babaen iti panangidaulo dagiti 32 nga istasion ti Bombo Radyo ken Star FM.
Mainaig iti daytoy, Dinayaw ni Gordon dagiti blood donor nga imbilangna a “Bannuar iti Kabaroan a Panawen” gapu iti awan sarday a pannakikaysada iti napateg a proyekto a mangisalakan iti biag.
Impalagipna pay a ti kada tedted ti dara a maipaay ket mangsilpo iti biag ti asinoman a kabagyan, gayyem, ken uray dagiti saan nga am-ammo iti panawen ti emergency ken nakaro a kondision.
