VIGAN CITY – Temporaryo a maipasarra ti border ti Cervantes, Ilocos Sur tapno maliklikan ti pangta ti Covid19 UK variant kas nailanad iti Executive Order nga imparuar ni Gov. Ryan Singson.
Dayta ket tapno naing-inget a mabantayan ti border iti ili ti Cervantes ken maliklikan ti panagiinnakar iti B.1.1.7 SARS CoV-2 variant iti probinsia.
Dagiti maipasarra a border kadagiti tattao ken lugan a sumrek ket pakairamanan ti Commilas North Border Quarantine Checkpoint ken Aluling Border Quarantine Checkpoint ken saan pay nga ammo no kaano a maikkat.
Nupay kasta, ti Cervantes-lgu ken ti Philippine National Police ket nabilin a mangbantay kadagiti amin a border iti lugarda.
Malaksid ti dayta, maipasardeng pay laeng ti panagiwarasan iti travel authority kadagiti Non-APOR travallers a mapan iti aniaman a siudad ken ili ti Cordillera Administrative Region.
