Babalawen ni Barangay Captain Ligaya Foronda iti Laslasong West, Sta. Maria, Ilocos Sur ti pannakapirma ti Certificate of Completion ti mapapati a P50 million a gatad ti flood control project iti nasao a barangay uray no saan pay a naileppas ken adda dagiti pasetna a nadadael.
Iti pannaki-uman ti Bombo Radyo Vigan ken ni Foronda, mangnamnama a maipaayan daytoy ti atensyon ta maamak nga amangan no dumteng manen ti didigra ket madadaelto metten ti intero a barangay a pagnanaedanda.
Immuna nga immasideg kenkuana ti contractor ti proyekto a ni Jomar Khan nga agpapirma iti nasao a certificate ngem saanna a pinirmaan ta blangko pay laeng idi ti detalye ti proyekto isu a kiniddawna a maited kenkuana ti program of work ngem saandan a nagsubli, no di ket impapirmadan iti dati a kapitan.
Ngem idi sinaludsod ti agdama a kapitan iti kontraktor no apay a kasta ti nagbalin a proseso, insungbatda nga isu ti imbalakad kadakuada ti kapitolyo.
Inlawlawag ti agdama a mangidaulo iti barangay a saan a nayuman kenkuana a nasayaat ti pannakapirma ti nasao a proyekto numan pay namnamaenna a mapagpapatanganda a nasayaat daytoy tapno nagiinnadalda koma para iti pagsayaatan dagiti agindeg.
