Inlawlawag ti Catholic Bishops’ Conference of the Philippines a saan a kas iti pagarup ti kaaduan, awan ti aktwal a top contenders kadagiti cardinal a mairaman iti conclave tapno pilien ti sumaruno a papa kasaruno ti pannakatay ni Pope Francis.
Inlawlawag ni CBCP Spokesperson Fr. Jerome Secillano a ti asinoman kadagiti 135 a cardinal a sumrek iti conclave ket mabalin a sumukat iti natay a pontiff, no la ket makaalada iti two-thirds a botos.
Tallo a Filipino cardinals ti mabalin a makipaset iti general congregation dagiti cardinals, isuda – Cardinal Luis Antonio Tagle, Manila Archbishop Jose Cardinal Advincula, ken Kalookan Bishop Pablo Virgilio Cardinal David.
Immunan a pinasingkedan ni David nga amin a cardinal a makipaset iti conclave ket mabalin a mapili babaen iti Holy Spirit a sumaruno a Papa, uray no saan a sikat, kas ken ni Pope Francis idi.
