Simmungbat ni Senador Alan Peter Cayetano iti naipila nga obstruction of justice kontra kenkuana maipanggep iti panaglibas ni Senador Ronald Bato dela Rosa manipod Senado idi parbangon iti May 14 kas pinasingkedan ti Office of the Ombdusman.
Kinumpirmaran met ti Ombudsman a naawatdan ti counter-affidavit ni Cayetano idi Mierkules kas tignay iti complaint-affidavit nga impila ti Tindig Pilipinas idi Hunyo 3.
Kinuna ti anti-graft body a ti counter-affidavit ti senador ket tignay iti agtultuloy a preliminary investigation iti reklamo nga impila dagiti miembro ti civil society.
Malaksid ken ni Cayetano, karaman kadagiti respondent iti reklamo da Senador Robin Padilla ken naikkat a Senate Sergeant-at-Arms Mao Aplasca.
Kabayatanna, saan pay a nakapasa da Padilla ken Aplasca ti counter-affidavit-da kas kinuna ti Ombudsman.
