Nagpatulong iti Korte Suprema ni Cassandra Li Ong, Incorporator ti Whirlwind Corp. ken mapapati a kakunsabos ni dismissed Bamban, Tarlac Mayor Alice Guo tapno amwen nu adda grave abuse of discretion iti biang ti agpampanday linteg iti panag-imbestigar iniag iti mapapati a nakainaiganna kadagiti illegal nga aktibodad dagiti POGO.
Babaen ti abogadona a ni Ferdinand Topacio, impila ni Ong ti petition for certiorari and prohibition kontra iti Congressional panels nga agim-imbestigar iti pakainaiganna ti POGO hub a nakabase iti Porac, Pampanga.
Inyunay-unay ni Ong a maiyaleng-aleng ti constitutional rights-na kas ti right ti remain silent, right against self-incrimination, ken right to counsel iti naisayangkat a panagdenggeg iti Kamara.
Iti agdama ket adda iti kustosiya iti Kamara ni Ong kas paset iti panagimbestigar iti mapapati a kainaiganna iti Lucky South 99 POGO a rinaid dagiti otoridad iti Hunyo.
