VIGAN CITY – Maysa iti nakemmeg idinto a nakalibas ti kaduana gapu iti panang-carnap da iti maysa a motorsiklo idiay Barangay Luba, Sta. Lucia.
Ti biktima ket ni Johnny Ablang Pascua, agtawen iti uppat a pulo ket innem, naasawaan, Brgy. Tanod nga agnaed idiay Barangay Luba Sta. Cruz; ken ti nakemmeg a suspek ket ni Jemar Abarquez Gamer, agtawen iti tallopulo ket maysa idinto a ti nakalibas ket kabsatna a ni Kevin Abarquez Gamer, baro nga agpada nga agnaed idiay Barangay Patpata 2nd, Candon City.
Iti pannaki-uman ti Bombo Radyo Vigan ti biktima a ni Johnny Ablang Pascua, apaman a naiparking ti motorsiklona ta napanna kinita ti tarakenna a baka idin kellaat a napan dagiti dua a lallaki a nagmotorsiklo ket intarayda iti luganna.
Segun kenkuana, nagbugkaw isuna iti panangalada iti motorsiklo ket impadasna a kinamat ida ket gapu ta nagslide iti manmanehoenda ket nagpaarayat kadagiti residente isu a maysa iti nakemmegda idinto a ti maysa ket nakalibas.
Patien ti biktima nga aniaman a klase iti lugan ket plano a takawen dagiti suspek ta saan laeng nga isuna iti agparparking iti nasao a lugar ta adu pay dagiti kakaduana ngem nairana a motorsiklona iti tinargetda.
VIDEO – JOHNNY ABLANG PASCUA
Pinasingkedan met ni PSSg. Albert Benitez nga investigator-on-case iti Sta. Lucia Municipal Police Station nga ilibak ti nakemmeg a suspek iti panangalada iti nasao a motorsiklo ngem patien ti akin-kukua a gandatda nga alaen ta inandarda.
Gapu ti dayta ket nagpalagip ni Benitez kadagiti amin a motorista a saan nga ikkan iti gundaway dagiti agtatakaw, saan a lipatan ti tulbek iti motorsiklo kadagiti lugan ken siguradoen a ti pagparkingan ket natalged tapno saan a maulit iti kas ti nasao a banag.
VIDEO – PSSG. ALBERT BENITEZ
