VIGAN CITY – Alallukyen ti gobierno dagiti tiktoker a makipaset iti video contest a mangitandudo ti gatas ti nuang kas panagsagana iti selebrasyon ti World Milk Day inton June 1.
Maitampok iti pasalip ti kinapateg ti gatas ti nuang a mangipaay ti dekalidad a nutrisyon ken ti akemna a mangsustiner iti panagbiag dagiti pamilia a mannalon.
Nangisagana ti Department of Agriculture – Philippine Carabao Center ti gunguna kadagiti video content creators a makaitampok ti kapintasan a video maipanggep iti benepisyo ti carabao’s milk a silulukat para iti amin malaksid kadagiti empleyado ti DA-PCC.
Maysa laeng nga entry tunggal makipaset ti maipalubos, masapol a ti DA-PCC’s Wow na Wow theme song ti maaramat a kanta ken saan a nasursurok ngem iti dua a minutos ti videona.
Maikkan ti puntos dagiti video babaen dagiti criteria kas ti visual impact a 35%; choreography ken execution 35% ken tiktok reactions a 30%.
Ti grand winner ket mapangabakanna ti 10,000 pesos ; ti 1st winner ket 7,000 ken 5,000 met ti maala ti 2nd winner.
Maipakaammonto dagiti mangabak inton kaaldawan ti selebrasyon inton June 1 ,2024.
