VIGAN CITY – Pormalen a nalukatan ita nga aldaw kadagiti turista manipud ti Region 1 ken Baguio City dagiti sumagmamano a sikat a pagpasiaran iti Ilocos Sur.
Dayta ket babaen iti panangiyuswat ti Ridge and Reef Travel Corridor ti Region 1 ken Baguio City iti panangidaulo ni Gov Ryan Singson, Department of Tourism Reg. Dir. Jeff Ortega ken dadduma pay nga opisial ti probinsia.
Ti nasao a travel corridor ket resulta iti naisayangkat a travel bubble iti nagbaetan dagiti gobernador kadagiti uppat a probinsia a mangbukbukel ti Region 1 ken ni Baguio City Mayor Benjamin Magalong kadua ni Tourism Sec. Bernadette Romulo-Puyat idiay Baguio City idi Setyembre.
Gagem ti panaglukat ti turismo ti Ilocos Sur kadagiti turista ti Baguio City ken kabangibang a lugar ti Region 1 a maibangon ti sektor ti turismo ita a panawen ti pandemia ngem limitado laeng iti limapulo a turista iti inaldaw ti mapalubosan nga agpasiar kadagiti napili a tourist destination ti probinsia ken makompleto ti requirements da sakbay a makastrekda kas ti Rapid Antigen test ken itinerary.
Sumgamamano kadagiti sikat a pagpasiaran ti Ilocos Sur ket a mabalinen a papanan dagiti turista ket ti Calle Crisologo, Ilocos Sur Musical and dancing fountain, Syquia mansion ken Baluarte zoo ti Vigan City; Ilocos Sur Adventure zone ken Caniaw Heritage and Forest Park idiay Bantay; Pinsal Falls ken Heritage Church ti Sta. Maria; Pinakbet farm ti Caoayan; Vitalis Villas ti Santiago ken Ichtus Beach Resort ti Magsingal.
