VIGAN CITY – Maysa a caliber 38 a paltog ti naala dagiti pannakabagi ti linteg San Esteban Police Station babaen ti pannakaiwayat ti search warrant operation iti pagtaengan ni Edwin Vidal a suspek iti pammaltog idiay Barangay Bateria, San Esteban idi December 25.
Ti biktima ket ni Jay-Ar Reyes Vidal, agtawen iti duapulo ket walo, agnaed met laeng iti Barangay Bateria, iti nasao nga ili a nagsagaba iti tama ti paltog iti bukot ken ulona.
Iti pannaki-uman ti Bombo Radyo Vigan ken ni Police Major Aurelio Manantan, inallukoyda ti suspek nga isuko ti paltog nga inaramatna tapno saanen a dakdakkel ti agbalin a parikut isu a nagpakadua met iti kataltalunan nga isu ti ibagbagana a nangipurwakanna iti paltog ngem awan ti nasarakan dagiti pannakabagi ti linteg.
Gapu dayta, napilitanda nga ipakatan iti search warrant tapno sapulen iti pagtaengan ti suspek ti paltog nga inaramatna iti pammapatay.
Maidalan met iti ballistic examination ti paltog tapno matakuatan no daytoy ti naaramat iti pannakatay ti biktima.
Kabayatanna, naipilan ti kaso a murder kontra iti suspek a boluntaryo a simmuko babaen ti panangkadua ti kapitan iti barangay idi December 26.
