VIGAN CITY – Agtultuloy ti panangsapul dagiti kameng ti Cabugao Police Station iti suspek ti pannakapaltog ni Richard Tayaoa, agtawen iti duapulo ket innem, taga-Barangay Cacandongan, San Juan, maysa nga agbotbote-landok.
Iti pannaki-uman ti Bombo Radyo Vigan ken ni Officer in charge Police Executive Master Sergeant Prudencio Tabbay, naggapu idiay San Juan ti biktima a mapapati a mapan aggatang iti bote landok idiay Cabugao babaen ti minanehona a kurong-kurong idi adda dagiti nagkallubon iti motorsiklo a suspek a mangsursurot kenkuana manipud iti naggapuanna agingga iti lugar a nakapaltoganna.
Naipaagas iti Suero General Hospital ti biktima ngem naideklarar a dead on arrival gapu ti tama iti paltog ti ulo ken bagina.
Naala met manipud iti nakapasamakan ti krimen ti sangapulo a basyo ti kalibre 45 a paltog.
Segun ken ni Tabbay, naibaga kadakuada ti live-in partner ti biktima nga adu dagiti pammabasul kenkuana panggep iti takaw ngem awan met ti maaw-awatna a pangta iti biag.
2019 ket natiliw ti biktima idiay Barangay Napo, Magsingal gapu ti panagtakawna iti sinerrekna a pagtaengan ket nakonbiktaran iti dua a tawen ken uppat a bulan a pannakaibalud ngem nakaruar babaen iti probation.
Nupay kasta, immapela ni Tabbay uti publiko a saanda nga agbuteng a mangipakaammo kadakuada no adda dagiti ammoda nga impormasyon para iti alisto a pannakasulbar ti kaso.