VIGAN CITY – Addan pamalpalatpatan dagiti pannakabagi ti linteg iti Cabugao Municipal Police Station no ania ti posible a rason iti pannakapaltog ni Patricio Soto, agtawen iti uppat a pulo ket pito a taga-Barangay Turod, Cabugao.
Segun ken ni PMaj. Juan Jhayr Maggay, mangidaulo iti Cabugao Municipal Police Station, natalgeden ti kasasaad ti biktima numan pay naglak-am iti nakaro a tama iti bala ti paltog ti nadumaduma a paset ti bagina.
Nasurok duapulo a basyo ti M16, caliber 30 ken caliber 45 a paltog ti naala iti nakapasamakan ti krimen.
Maipalagip a sinerrek dagiti saan pay a nabigbig a suspek ti pagtaengan ti biktima ket pinaltuganda iti namin-adu a daras.
Nupay kasta, namnamaen dagiti pannakabagi ti linteg a maikkan iti hustisia ti pannakapaltog ti biktima.
