Vigan City – Mapatta patta nga aggatad iti pito ribo uppat a gasut iti naala a siam a sachet iti mapapati a shabu kenni Frediberto Santella, agtawen ti tallo pulo ket walo, naasawaan nga agnaed iti Barangay Bonifacio, Cabugao a nakemmeg iti naiwayat a buy bust operation idi kalman idiay Barangay Baclig, Cabugao.
Iti pannaki-uman ti Bombo Radyo Vigan ken ni PCapt. Ramil Llarenas, hepe iti Cabugao Municipal Police Station, ti suspek ket makabulanen a sipsiputanda ta maysa isuna a subject iti case operational plan iti provincial intelligence unit.
Segun kenni Llarenas, nakemmeg ti suspek babaen iti nagpammarang a poseur buyer ket idi nakagatang ket insigidada a kinapkapan ti suspek a nakaalaan iti uppat a sachet iti mapapati a shabu, ken nakaalaanda iti lima a sachet iti mapapati a shabu iti luganna.
No pay kasta ket addan iti kustodiya dagiti pannakabagi ti linteg ni Santella ken dagiti naala kenkua para iti usto a proseso ket mayur-uray iti resulta iti drug test a naisayangkat kenkuana.
