Maipatungpal kadagiti business establishment iti Vigan City ti requirement a nasken nga adda uray maysa a makaammo nga agaramat iti fire extinguisher.
Iti pannaki-uman ti Bombo Radyo Vigan ken ni City Councilor Ignacio Tadeo, paset ti addang iti baro nga ordinansa a ti gagemna ket mapapigsa ti kinasagana dagiti establisimiento no adda uram.
Napaliiw ni Tadeo nga uray no requirement iti panangala ken panagi-renew iti business permit ti kaadda ti fire extinguisher, saan daytoy a kanayon a maaramat nga insigida no adda uram gapu iti panic wenno kinaawan ammo iti husto a pannakaaramatna.
Gapu dayta, imandatoda nga adda maysa nga empleado iti kada establisimiento a dumalan iti training ken ammona ti agaramat iti fire extinguisher.
Gagem ti addang a maliklikan ti peggad nga itunda ti uram kas ti pannakapukaw ti biag ken sanikua.
