VIGAN CITY – Nakasaganan ti Bulala Elementary School kadagiti mausar a para iti salun-at ken kinatalged dagiti agbotos inton Lunes, Mayo 9.
Segun ken ni PMSg. Alexander Pasion, Officer-in-charge iti nasao a pagadalan, mausar ti Bulala Elementary School para kadagiti agbotos a taga-Barangay Paratong ken Bulala.
Karaman kadagiti naisaganan dagiti maaramat nga alcohol, thermometer, health declaration form ken dadduma pay.
Inlawlawagna nga adda step-by-step a suroten iti panagserrek kadagiti polling precinct kas ti panagaramat iti alcohol, ken pannakakita ti temperatura ti bagi.
No matakuatan a nabara ti temperatura ti maysa a botante, maipan pay laeng iti isolation booth sakbay a makita manen ti temperaturana.
Awan met ti nagbalin a parikut iti final testing kadagiti vote counting machine nga agpatpatnag a mabambantayan.