VIGAN CITY – Saan a ninamnama ti maysa kadagiti summa cum laude manipod University of Northern Philippines iti naalana a pammadayaw iti panagturposna iti kolehio ta narigat dagiti naglalasatanda a batch.
Iti pannaki-uman ti Bombo Radyo Vigan ken ni Niña Paulette Florendo Agsaullo, Summa Cum Laude iti UNP a nangala ti kurso a Bachelor of Science in Secondary Education major in Filipino, naragsak isuna iti naalana a pammadayaw ta isagutna iti nagannakna ken pamiliana.
Segun ken ni Agsaullo, saan a nadaras iti naglasatanda ta isuda pay iti kaunaan a batch iti K-12 program a nagturpos iti kolehio ket dakkel pay a karit iti panagbasada idi addan iti covid-19 pandemic ta agduduma a parikot iti sangsangwenda iti panagbasada.
Inlawlawagna a manipod pay laeng idi ubing isuna ket kalikagumnan iti agbalin a mangisursuro isu nga innalana iti BSEd ket uray awan iti amammona idi rugrugi ket nariknana iti panangpaspasangbay kenkuana dagiti kaadalanna.
Nagbalin nga inspirasyonna iti panagbasa dagiti nagannakna ta ti inana ket mangisursuro idinto a ti amana ket dati met laeng a mangisursuro sakbay a nagbalin a pulis.
Dakkel iti naitulong iti panagbalinna nga student leader idi nagbasa isuna iti high school ta nagbalin a naturtured iti panagsaona iti kaaduan ti tao ta datin a managbabain.
Kinunana pay a ti panagsaritana idi graduation iti College-da ket isu iti kaunaan a gundawayna a nag-valedictory speech ket dakkel a pribilehio kenkuana ta nakaibingay iti kapanunotanna ken experience-na ta ammona nga adda latta dagiti maka-relate kadagiti imbagbagana.
Inallukoyna dagiti ag-first year student iti kolehio a surotenda a nalaing nu ania iti kayatda nga alaen a kurso ta isuda iti agbasa para iti masakbayanda ket nu man adda iti mangtagtagibassit kadakuada ket mamati laeng iti kabaelan.
Kasta pay a pinasingkedanna kadagiti agturpos nga aniaman a rigat a napapasaran ket agyaman lattan iti bagi ken iti Namarsua ta naleppasdan it panagadalda ket nu man nabannogda ket aginana laeng ken saan a sumuko kadagiti arapaap iti biag.
Kabayatanna, maysa ni Agsaullo kadagiti lima a kaunaan a nag-summa cum laude a pakasaritaanen iti UNP.
