Naisangpeten ti kabaroan a guided missile frigate iti Philippine Navy a BRP Diego Silang (FFG-07) iti Naval Operating Base idiay Subic, Zambales kagiddan ti pannakairusat ti Sail Plan 2040, maysa a long-term strategic roadmap a nadisenyo tapno pagbalinen ti Philippine Navy “modern, multi-capable naval force” iti uneg iti sangapulo ket lima a tawen.
Limmayg ti BRP Diego Silang iti Subic Bay a napan iti ceremonial reception ket pinasangbayan da Armed Forces of the Philippines (AFP) Chief of Staff Gen. Romeo Brawner Jr. ken Philippine Navy Flag Officer in Command (FOIC) Vice Admiral Jose Ma Ambrosio Ezpeleta.
Ti commanding officer iti baro ket ni dati a Philippine Navy Spokesperson Captain John Percie Alcos.
Impaganetget ni Brawner a ti baro a frigate ket mangipakita iti sumaysayaat a kapabilidad iti Philippine Navy ken nalawag a gagem ti ahensya a papigsaen ti maritime defense posture kagiddan ti kimmaru a karit iti maritime idiay West Philippine Sea.
Segun ti military chief, ti BRP Diego Silang ket simbolo iti panangsolbar iti pagilian tapno depensaran iti aniaman a sanikua, tapno tumakder a sangsangkamaysa iti panangsango kadagiti karit, ken tapno ipakita ti kinasagana a mangsalaknib iti pagsayaatan dagiti tattao.
