VIGAN CITY – Natayen idi naisangpet iti pagagsan ni Godofredo Gadia, agtawen iti limapulo ket walo, Brgy. Tanod ti Brgy Ayudante, Candon gapu ti pannakadungpar kenkuana iti maysa a van kabayatan ti duty-na.
Nabigbig ti drayber ti van a ni Reynaldo Mejia, agtawen iti uppat a pulo ket pito, office staff ti Guanzon Merchandise Corporation-Mangaldan, Pangasinan Branch a taga-Dagupan City, Pangasinan ken dagiti inluganna ket da Mryan Baniqued, agtawen iti tallopulo, padana nga office staff.
Iti pannaki-uman ti Bombo Radyo Vigan ken ni PMaj. Pol Arreola, Deputy Chief of Police ti Candon City Police Station, agpapa-amianan a direksyon ti van idin ta naidungsa ti drayber ket napan iti bangir a linya ti kalsada ket immuna a naidungpar iti internal border control ti Candon sakbay a nadungparna ti biktima nga agtugtugaw ken nairaman pay ti motorsiklo a nakaparking a kukua ni Marcelino Galao.
Naipaagas iti ospital ni Gadia ken ti driver karaman dagiti pasaherona ngem saanen a nakalasat ti biktima.
