Dead on arrival ti maysa a Barangay Secretary kalpasan a kinettelna iti bukodna a biag idiay Sta. Maria, Ilocos Sur idi kalman, July 2, 2026 .
Ti biktima ket agtawen iti tallopulo ket tallo, naasawaan nga agnaed iti nasao nga ili.
Nakaawat dagiti pannakabagi ti linteg ti pakaammo maipanggep iti nasao a pasamak isu a nagrespondeda.
Segun iti witness a senior citizen, nadiskubrena ti biktima a nakabitin iti maysa a sanga ti kayo ti manga.
Mapapati nga inuli ti biktima iti kayo ken ingalotna ti tali iti tengngedna.
Nagpatulong ti witness tapno maikkat ti tali tapno maibaba iti biktima ket naipan iti Ilocos Sur District Hospital idiay Narvacan ngem naideklarar a dead on arrival babaen ti attending physician-na.
Naduktalan iti imbestigasyon a ti motibo iti insidente ket gapu iti parikot iti pinansyal gapu iti saan a nabayadan nga utang ken saanna a naipastrek para iti Small Town Lottery (STL) nga aggatad iti P500 a mapapati a nangabak.
