Vigan City – Inkalintegan ni Tay-ac, Bantay Barangay Secretary Ginalyn Paet Teja nga awan iti linabsing da a pagannurutan inaig ti social amelioration program iti kangitingitan dagiti pammabasol kenkuana a dagiti kakabagyanna iti kangrunaan a nabenepisyaran iti nasao a programa.
Segun ken ni Teja, adda ti assessment ken re-validation a naisayangkat tapnu maamuan nu siasino dagiti kwalipikado iti nasao a programa ket kinuyog na laeng dagiti napan nag-validate.
Ingunam-gunam na a saan nga amin a kakabagyanna ket nabenepisyaran iti nasao a programa ken saan nga isu iti nangpili nu siasino dagiti maikkan.
Innayon na a ti tunggal household ket maysa laeng ti benepisyaryo ken dagiti kwalipikado a naikkanen ti tulong ket nai-refer pay iti DSWD-Regional Office.
Kiniddaw ni Barangay Chairman Jose Madriaga a maisardengen ti adu a reklamo ta isu iti mangdadael iti langen-langen ti agkakalugaran ket inulit na a sinurot da amin a naipaulog a pagannurutan isu a patiyen na nga awan iti nagbiddutan da ta kadagiti nasurok uppat a gasut a targetda a maikkan ket duagasut pitopulo ket dua laeng ti kwalipikado.
