VIGAN CITY – Dinangran ti maysa a Barangay kapitan ti maysa a kagawad idiay Brgy. Bessang, Burgos, Ilocos Sur.
Maibasar ti pakaammo manipod Burgos Municipal Police Station, nabigbig ti biktima a ni Barangay Kagawad Ricky Encarnacion Luneza, agtawen ti uppat a pulo ket pito, naasawaan ken mannalon idinto a ti suspek ket ni Brgy. Capt. Efren Santiago Vitales, naasawaan nga agpada nga agnaed iti nasao a lugar.
Nagturong ti kagawad kadagiti pannakabagi ti linteg ket inreklamona ni Brgy. Capt. Vitales gapu ti panangdanogna kenkuana.
Segun ti biktima, nagturong isuna iti pagtaengan ti kapitan tapno pirmaan ti minutes iti barangay accomplishment meeting-da idin kinomprontarna ti kapitan ken binagaanna a nu maipapan ti barangayda ken trabahona kas Barangay Kagawad ket nasaysayaat nu pagpatanganda laengen ket saan a ti group chat-da isu nga insungbat ti kapitan a padasenna ti agbalin a kapitan tapno ammona ti ibagbagana.
Nupay kasta idi pumanawen ti kagawad ket nagbinnarada isu a sinurot ti kapitan ket dinanogna iti pingping ti biktima a gappuanan ti pannaka-injury na.
