Maysa a nadundunor a dolphin iti narescue iti igid iti kabaybayan idiay Barangay Dardarat, Cabugao, Ilocos Sur.
Iti pannaki-uman ti Bombo Radyo Vigan ken ni Petronila Corrales Saribay a nakikakita iti dolphin nga agnaed iti nasao a lugar, bayat iti kaaddada iti igid iti kabaybayan ket nakita iti kanakanna ti dolphin ngem impagarupna a mamatay nga ikan ngem idi inasitganna ket isun ti pannakakitana ti dolphin.
Segun ken ni Saribay, agkakapsot, nadunor iti bagi ken adda galot iti subsob iti dolphin isu nga impakaammoda kadagiti kameng ti Coast Guard ta ammona a saan a mabalin a bibianganda iti nasao a dolphin ket insigida a nagresponde dagiti maseknan.
Pinasingkedan ni Lt. Ronnie Esparagoza a Philippine Coast Guard Provincial Commander nga iti panagrespondeda ket naamoan a maysa a bottlenose dolphin a babai iti nasarakan ni Saribay.
Segun ken ni Esparagoza, ti dolphin ket adda kaatiddog a 200cm ken adda kaakabana a 51cm isu a patienda nga ubing a dolphin dayta.
Patienda a maysa nga aldawen a napuliputan ti tali ti dolphin ket gapu iti kapsotna ket naiyanud a naipan iti igid iti baybay.
Nupay kasta, idi naikkat iti nylon iti subsob iti dolphin ket napakan ken napalubosan met laeng ta nasalun-at iti kasasaadna kas maibasar iti assessment nga insayangkat.
