VIGAN CITY – Inlawlawag ni Acting Municipal Health Officer Dr. Angelo Gurion nga awan ti naimandato a nasken a dagiti laeng nakaawat iti booster shot ti makastrek iti Narvacan Farmer’s Market.
Dayta ket kalpasan nga adu dagiti nagreklamo iti social media nga umili ken dagiti negosyante iti tiendaan ti Narvacan a saanda a makalako gapu ta mapilitan met ti dadduma a mapan iti tiendaan ti Sta. Maria.
Segun ken ni Gurion, iti Executive Order a nayulog idi September 14, sagudayenna a maallukoy laeng dagiti umili nga agpabakuna ngem saan a maimandato ti panagpabakuna, isu a dagiti mapan makitienda a saan pay a nabakunaan iti booster shot ket mabalin latta a makastrek iti tiendaan.
Malaksid dayta, inlawlawagna pay a saan nga isuda ti naggapuanna no apay nga adu dagiti saan a napastrek a saan a nakaawat pay iti booster shot.
Paset ti tignayda nga agtungpal iti bilin ni Presidente Ferdinand “Bongbong” Marcos Jr., a makompleto ti 50 percent a target a mabakunaan iti booster shot ken 90 percent iti primary series babaen ti PinasLakas campaign.
Nupay kasta, impaganetget ni Gurion a ti booster shot ket pagsyaatan met laeng iti tunggal maysa agsipud ta adda pay laeng pangta ti Covid19 ket no adda man marikna a panagkapsut ken panaggurigor ket normal laeng a mapasaran kalpasan a nabakunaan.
Immunan nga inyebkas ti maysa nga agtagilako iti Narvacan Farmer’s Market a ni Genilita Bobiles a nasurok tallopulo a kilos ti karne ti saanda a nalako idi kalman gapu ta saan a mapastrek dagiti saan a nabakunaan iti booster shot ta pilpilienen dagiti aggatang ti mapan makitienda iti ili ti Sta. Maria.
Malaksid dayta, kiniddawna met kadagiti agpat-paticket kadakuada a saanna nga ibagabaga iti social media a switik ti pagkilwanda tapno saanda met a mairamraman nga awan iti kasta nga aramidna agsipud ta malaksid iti booster ket mabutengen dagiti umili a mapan makitienda gapuen kadagiti immunan a natiltiliwan a madi ti pagkilwanna.
