Rambakan ita nga aldaw ti Bombo Radyo Philippines ti historical 60th anniversary-na – 6 a dekada nga awan sarday a panagserbi kadagiti Pilipino babaen iti napudno, napaspas, ken mapagtalkan a damag.
Sipud inyestablisar idi July 6, 1966 ti visionary founder a ni Don Marcelino M. Florete Sr. ken ita ket idaulwan ni Dr. Rogelio M. Florete, Chairman ti Bombo Radyo Philippines, rimmangpaya ti Bombo Radyo manipud iti maysa nga station a nagbalin a katibkeran ken kangrunaan a mapagtalkan a radio network iti pagilian.
Iti agdama, adda 32 a digitalized nga AM ken FM stations kadagiti 25 a lugar iti intero a Pilipinas.
Iti uneg ti 6 a dekada, nagbalin a napateg a paset ti biag ti minilion a Pilipino ti Bombo Radyo.
Iti panawen ti didigra, eleksion, krisis, ken kadagiti kanito ti panagrambak, nagtaltalinaed a kangrunaan a pagalaan iti damag, impormasion, komentaryo, ken serbisio publiko.
Malaksid pay iti broadcasting, agtultuloy nga intal-o ti network dagiti programa a mangipapaay iti direkta a serbisio kadagiti umili kas ti Bombo MEDICO – ti medical, dental ken optical program, DUGONG BOMBO – ti nationwide blood letting campaign, ken BOMBO MUSIC FESTIVAL a mangitaltal-o iti Original Pilipino Music.
Nabigbig pay ti Bombo Radyo Philippines babaen kadagiti nadumaduma nga institusion gapu iti kinalaingna iti panagipadamag.
Karaman ditoy ti pannakapadayaw ti Bombo Network News kas Best News Program ti Catholic Mass Media Awards idi 2024 ken 2025, kasta payen ti pannakabigbig kas Radio Network of the Year ti Rotary Club of Manila iti 2026 Pro Patria Journalism Awards.
Iti panangrambak iti maika-60 nga anibersaryona, pabaroen manen ti Bombo Radyo Philippines ti karina nga agbalin a numero uno ken mapagtalkan a pagalaan iti damag ken impormasion – agtultuloy a mangital-o iti balanse a komentaryo, patas a panangipadamag, ken napnuan kaes-eskan a serbisio publiko para iti kada Pilipino.
Iti uneg ti 60 a tawen, maymaysa a nagan ti agtaltalinaed a kadua dagiti umili – Bombo Radyo Philippines. Maysa a nagan a pudno a nagbalinen nga “A Way of Life for Filipinos”.
BASTA RADYO… BOMBO!
