Mamati ni House Speaker Faustino “Bojie” Dy III a nasken nga agserbi nga inspirasion ti 2026 Palarong Pambansa tapno maallukoy dagiti agtutubo a Pilipino nga agarapaap, agsalukag, ken mamati iti kabaelanda.
Iti mensahe ni Dy para iti national sporting event a pormal a marugian ita ken agpaot agingga Mayo 31 idiay Prosperidad, Agusan del Sur ket kinunana a napateg ti sports iti panangmuli ti disiplina, kinatibker ken panangidaulo ti agtutubo.
Impaganetget ni Dy a ti Palarong Pambansa ket saan laeng a kompetision para iti medalya no di ket panangrambak iti kinagaget, sakripisio, teamweork, ken kinasalukag dagiti atleta nga estudiante manipud iti nadumaduma a paset ti pagilian.
Para kenkuana, nangabak amin a kasali gapu iti dedikasion nga impakitada tapno makagteng iti Palarong Pambansa.
