Limmabesen iti target ti naur-or a pastrek ti Bureau of Customs idi Hulyo kalpasan nga immabot iti P85.77 billion, nangatngato iti P3.77 billion no ikumpara iti target nga P82 billion.
Segun ken ni Customs Commissioner Ariel Nepomuceno, nakatulong ti panagpangato ti koleksion ti naing-inget a panangkita kadagiti importasion ken ti napabileg a performance dagiti pantalan.
Innayonna nga umabot iti P3.8 billion agingga P4.2 billion ti gagangay nga inaldaw a koleksion ti ahensia.
Agsagsagana metten ti BOC a mangilako iti umabot ti 200 a nakumpiskar a lugan nga aggatad iti nasurok-kumurang P500 million, kalpasan a nakaru-or iti P340 million manipud iti naglakwan kadagiti nakumpiskar a lugan ita a tawen.
Ita a tawen ket target ti ahensia ti makaur-or iti P1.1 trillion a pastrek para iti tawen 2026.
