Nakaibayog ti Blue Alert Status iti probinsia kagiddan ti panagrambak ti Semana Santa.
Iti pannaki-uman ti Bombo Radyo Vigan ken ni Rhon Arquelada a Provincial Disaster Risk Reduction and Management Officer, ti blue alert status ket mangipasimudaag a naka-alerto a 24/7 dagiti pannakabagi ti linteg para iti panangsigurado ti kinatalged dagiti umili a holy week.
Segun ken ni Arquelada, agtitinnulong dagiti kameng ti PDRRM, Philippine National Police, Bureau of Fire Protection, Philippine Coast Guard, Non-Government Organization ken volunteers para iti panagbantay ti seguridad.
Impasiguradona pay nga amin a Local Government Unit iti probinsia ket maaddaan ti medical post, security post ken BFP post a mangkita iti pagsayaatan dagiti bisita wenno deboto ita a Semana Santa.
Namnamaen pay ni Arquelada iti panagturong iti kabaybayan, karayan ken resort dagiti umili inton Sabado ken Domingo isu a siguradoenda a full alert-da kadua dagiti kameng ti PCG tapno masigurado nga awan iti mairekord nga aniaman nga insidente nangruna iti pannakalmes.
Palagipna met kadagiti kameng ti pamilia a bantayan dagiti kakadua nangruna dagiti ubbing tapno awan iti maisagmak.
