Naisayangkat itay bigat ti blessing and ribbon cutting iti baro nga opisina ti Commission on Elections Ilocos Sur a masarakan iti Provincial Library.
Iti pannaki-uman ti Bombo Radyo Vigan ken ni Atty. Marino Salas, Provincial Election Supervisor, pagyamananda ti Ilocos Sur Provincial Government a nangipaay kadakuada iti baro nga opisina a dakkel a pakabang-aran dagiti empleado ta nakomkomportablen ti panagtrabahoda.
Kalpasan ti seremonya, nagtataripnong dagiti election officer tapno pagpatangan ti pannakaisayangkat ti training iti panagaramat kadagiti baro nga automated counting machine ken inton umay a lawas, addanto dagiti umay nga opisial para iti project of receipt verification.
Kabayatanna, mangrugi inton Nobyembre agingga Pebrero ket mai-demo iti kada barangay ti probinsia ti panagaramat iti automated counting machine isu a kiddawen ti opisial ti pannakipaset dagiti botante tapno awan ti agbalin a parikut no dumtengton ti aldaw ti eleksion.
Balakad met ni Salas kadagiti kandidato a surotenda dagiti election laws and regulations.
