VIGAN CITY – Nagkiddaw iti tulong ti maysa a lalaki ta natakaw ti bisikletana nga iparparkingna idiay Purok a Dakkel, Vigan City.
Iti pannakipapatang iti Bombo Radyo Vigan ken ni Victorino Andallo a biktima, natalek isuna a mangiparparking iti bisikletana ta awan met iti agal-ala idi kallabes isu a saanna a namnamaen nga adda iti nangtakaw.
Segun ken ni Andallo, saannan nga inreport pay kadagiti pannakabagi ti linteg ta awan iti paglugananna ken awan iti pagpletena a mapan kasta payen a naawanan iti namnama ta naigiddan dayta idi adda iti natakaw a kalding iti lugarda.
Masayangan ken agsakit iti nakem ni Andallo ta ti nasao a bisikleta ket isu iti araramatenna a pagluganan iti panagsapulna ken sentimental ta inted pay laeng iti inana.
Patienna a saan nga agnaed iti nasao a lugar iti nangala iti bisikletana ta ammona a mapagtalkan dagiti kalugaranna.
