Pa-imbestigaran ni Senador Erwin Tulfo ti maipagarup a panagbuo iti Letter of Authority a naaramat iti maipagarup a money-making scheme dagiti sumagmamano a kameng ti Bureau of Internal Revenue (BIR).
Iti naisingasing a Senate Resolution No. 180, imbilin ti Senate Blue Ribbon Committee a sukisoken ti isyu ti maipagarup a panang-gundaway iti uneg ti ahensia gapu ta adu dagiti damag a maar-aramat ti Letter of Authority iti harassment ken pasuksok kadagiti negosio.
Iti BIR, ti Letter of Authority ket opisial a dokumento a mangited ti permiso kadagiti revenue officer tapno agisayangkat ti tax audit iti maysa a negosio ken taxpayer.
Pinasingkedan ni Tulfo nga adda report dagiti sumagmamano a negosiante a nagbayaden ti buwis ngem inspeksionen latta dagiti kameng ti ahensia. Reynand Fontejon
