VIGAN CITY – Inawagan ti ACT Teachers Partylist nga “anti poor” ti pannakaipasardeng ti klase agingga awan iti bakuna kontra ti COVID19 nga imbilin ni Presidente Rodrigo Duterte.
Dayta ket gapu ta adu ti mangnamnama a nagannak a makaturposda iti panagadal tatta a tawen isu nga ikagumaan ti nasao a grupo a maisagana ti online teaching nga isu ti suportaran dagiti kaaduan a kongresista ken kasta payen ti mass testing kadakuada.
Iti pannaki-uman ti Bombo Radyo Vigan kenni Rep. France Castro, gapu ta madi iti face-to-face learning ket mangaramidda ti wagas tapno masursurwan latta dagiti estudiante a pakairamananen ti modular ken online class ken panangisayangkat ti survey ken ti panangkonsulta ti Departnemt of Education kadagiti stakeholders no ania dagiti wagas a mabalinda nga isingasing.
Ingunamgunam ti kongresista a rumbeng a marugianen a makita a naimbag ti parikut kadagiti nasulinek a lugar no maipatungpal ti online class kas iti kinaawan ti gadget a maaramat ken ti nakapsut a signal isu nga inawaganna met ti Department of Informations and Technology.
