Umaboten iti sangapulo ket uppat ti pakabuklan a bilang ti natay gapu iti Severe Tropical Sorm Opong ken dagiti immuna a dua a bagyo, idinto a nasurok lima ribo a pasahero ti stranded kadagiti nadumaduma a pantalan, segun iti National Disaster Risk Reduction and Management Council.
Walo ti nairekord a natay iti Cagayan Valley, sag-tallo iti Central Luzon ken Cordillera manipud iti epekto ti Opong, Mirasol, ken Nando.
Dua pay ti mapukpukaw ken sangapulo ket pito ti nadunor.
Umabot iti 1.2 milion nga agindeg manipud iti sangapulo ket maysa a rehion ti naapektaran iti tallo a bagyo, a nangdadael iti P794.8 milion a gatad ti imprastraktura ken P38.5 milion iti sektor ti agrikultura.
Segun iti Philippine Coast Guard, 5,520 a pasahero, truck drivers, ken cargo helpers ti stranded kadagiti 118 a pantalan, idinto a 2,701 rolling cargoes, 114 a vessels, ken 53 a motorbanca ti temporaryo a nailinong.
